Mandalas 9 - (1108 verses)
Mandala 9 · Verse 3
tava tya indo andhaso devā madhor vy aśnate | pavamānasya marutaḥ
Mandala 9 · Verse 4
tvaṁ hi soma vardhayan suto madāya bhūrṇaye | vṛṣan stotāram ūtaye
Mandala 9 · Verse 5
abhy arṣa vicakṣaṇa pavitraṁ dhārayā sutaḥ | abhi vājam uta śravaḥ
Mandala 9 · Verse 1
pari dyukṣaḥ sanadrayir bharad vājaṁ no andhasā | suvāno arṣa pavitra ā
Mandala 9 · Verse 2
tava pratnebhir adhvabhir avyo vāre pari priyaḥ | sahasradhāro yāt tanā
Mandala 9 · Verse 3
carur na yas tam īṅkhayendo na dānam īṅkhaya | vadhair vadhasnav īṅkhaya
Mandala 9 · Verse 4
ni śuṣmam indav eṣām puruhūta janānām | yo asmām̐ ādideśati
Mandala 9 · Verse 5
śataṁ na inda ūtibhiḥ sahasraṁ vā śucīnām | pavasva maṁhayadrayiḥ
Mandala 9 · Verse 1
ut te śuṣmāso asthū rakṣo bhindanto adrivaḥ | nudasva yāḥ parispṛdhaḥ
Mandala 9 · Verse 2
ayā nijaghnir ojasā rathasaṁge dhane hite | stavā abibhyuṣā hṛdā
Mandala 9 · Verse 3
asya vratāni nādhṛṣe pavamānasya dūḍhyā | ruja yas tvā pṛtanyati
Mandala 9 · Verse 4
taṁ hinvanti madacyutaṁ hariṁ nadīṣu vājinam | indum indrāya matsaram
Mandala 9 · Verse 1
asya pratnām anu dyutaṁ śukraṁ duduhre ahrayaḥ | payaḥ sahasrasām ṛṣim
Mandala 9 · Verse 2
ayaṁ sūrya ivopadṛg ayaṁ sarāṁsi dhāvati | sapta pravata ā divam
Mandala 9 · Verse 3
ayaṁ viśvāni tiṣṭhati punāno bhuvanopari | somo devo na sūryaḥ
Mandala 9 · Verse 4
pari ṇo devavītaye vājām̐ arṣasi gomataḥ | punāna indav indrayuḥ
Mandala 9 · Verse 1
yavaṁ-yavaṁ no andhasā puṣṭam-puṣṭam pari srava | soma viśvā ca saubhagā
Mandala 9 · Verse 2
indo yathā tava stavo yathā te jātam andhasaḥ | ni barhiṣi priye sadaḥ
Mandala 9 · Verse 3
uta no govid aśvavit pavasva somāndhasā | makṣūtamebhir ahabhiḥ
Mandala 9 · Verse 4
yo jināti na jīyate hanti śatrum abhītya | sa pavasva sahasrajit
Mandala 9 · Verse 1
pari soma ṛtam bṛhad āśuḥ pavitre arṣati | vighnan rakṣāṁsi devayuḥ
Mandala 9 · Verse 2
yat somo vājam arṣati śataṁ dhārā apasyuvaḥ | indrasya sakhyam āviśan
Mandala 9 · Verse 3
abhi tvā yoṣaṇo daśa jāraṁ na kanyānūṣata | mṛjyase soma sātaye
Mandala 9 · Verse 4
tvam indrāya viṣṇave svādur indo pari srava | nṝn stotṝn pāhy aṁhasaḥ
Mandala 9 · Verse 1
pra te dhārā asaścato divo na yanti vṛṣṭayaḥ | acchā vājaṁ sahasriṇam
Mandala 9 · Verse 2
abhi priyāṇi kāvyā viśvā cakṣāṇo arṣati | haris tuñjāna āyudhā
Mandala 9 · Verse 3
sa marmṛjāna āyubhir ibho rājeva suvrataḥ | śyeno na vaṁsu ṣīdati
Mandala 9 · Verse 4
sa no viśvā divo vasūto pṛthivyā adhi | punāna indav ā bhara
Mandala 9 · Verse 1
tarat sa mandī dhāvati dhārā sutasyāndhasaḥ | tarat sa mandī dhāvati
Mandala 9 · Verse 2
usrā veda vasūnām martasya devy avasaḥ | tarat sa mandī dhāvati
Mandala 9 · Verse 3
dhvasrayoḥ puruṣantyor ā sahasrāṇi dadmahe | tarat sa mandī dhāvati
Mandala 9 · Verse 4
ā yayos triṁśataṁ tanā sahasrāṇi ca dadmahe | tarat sa mandī dhāvati
Mandala 9 · Verse 1
pavasva gojid aśvajid viśvajit soma raṇyajit | prajāvad ratnam ā bhara
Mandala 9 · Verse 2
pavasvādbhyo adābhyaḥ pavasvauṣadhībhyaḥ | pavasva dhiṣaṇābhyaḥ
Mandala 9 · Verse 3
tvaṁ soma pavamāno viśvāni duritā tara | kaviḥ sīda ni barhiṣi
Mandala 9 · Verse 4
pavamāna svar vido jāyamāno 'bhavo mahān | indo viśvām̐ abhīd asi
Mandala 9 · Verse 1
pra gāyatreṇa gāyata pavamānaṁ vicarṣaṇim | induṁ sahasracakṣasam
Mandala 9 · Verse 2
taṁ tvā sahasracakṣasam atho sahasrabharṇasam | ati vāram apāviṣuḥ
Mandala 9 · Verse 3
ati vārān pavamāno asiṣyadat kalaśām̐ abhi dhāvati | indrasya hārdy āviśan
Mandala 9 · Verse 4
indrasya soma rādhase śam pavasva vicarṣaṇe | prajāvad reta ā bhara
Mandala 9 · Verse 1
ayā vītī pari srava yas ta indo madeṣv ā | avāhan navatīr nava
Mandala 9 · Verse 2
puraḥ sadya itthādhiye divodāsāya śambaram | adha tyaṁ turvaśaṁ yadum
Mandala 9 · Verse 3
pari ṇo aśvam aśvavid gomad indo hiraṇyavat | kṣarā sahasriṇīr iṣaḥ
Mandala 9 · Verse 4
pavamānasya te vayam pavitram abhyundataḥ | sakhitvam ā vṛṇīmahe
Mandala 9 · Verse 5
ye te pavitram ūrmayo 'bhikṣaranti dhārayā | tebhir naḥ soma mṛḻaya
Mandala 9 · Verse 6
sa naḥ punāna ā bhara rayiṁ vīravatīm iṣam | īśānaḥ soma viśvataḥ
Mandala 9 · Verse 7
etam u tyaṁ daśa kṣipo mṛjanti sindhumātaram | sam ādityebhir akhyata
Mandala 9 · Verse 8
sam indreṇota vāyunā suta eti pavitra ā | saṁ sūryasya raśmibhiḥ
Mandala 9 · Verse 9
sa no bhagāya vāyave pūṣṇe pavasva madhumān | cārur mitre varuṇe ca
Mandala 9 · Verse 10
uccā te jātam andhaso divi ṣad bhūmy ā dade | ugraṁ śarma mahi śravaḥ
Mandala 9 · Verse 11
enā viśvāny arya ā dyumnāni mānuṣāṇām | siṣāsanto vanāmahe
Mandala 9 · Verse 12
sa na indrāya yajyave varuṇāya marudbhyaḥ | varivovit pari srava
Mandala 9 · Verse 13
upo ṣu jātam apturaṁ gobhir bhaṅgam pariṣkṛtam | induṁ devā ayāsiṣuḥ
Mandala 9 · Verse 14
tam id vardhantu no giro vatsaṁ saṁśiśvarīr iva | ya indrasya hṛdaṁsaniḥ
Mandala 9 · Verse 15
arṣā ṇaḥ soma śaṁ gave dhukṣasva pipyuṣīm iṣam | vardhā samudram ukthyam
Mandala 9 · Verse 16
pavamāno ajījanad divaś citraṁ na tanyatum | jyotir vaiśvānaram bṛhat
Mandala 9 · Verse 17
pavamānasya te raso mado rājann aducchunaḥ | vi vāram avyam arṣati
Mandala 9 · Verse 18
pavamāna rasas tava dakṣo vi rājati dyumān | jyotir viśvaṁ svar dṛśe
Mandala 9 · Verse 19
yas te mado vareṇyas tenā pavasvāndhasā | devāvīr aghaśaṁsahā
Mandala 9 · Verse 20
jaghnir vṛtram amitriyaṁ sasnir vājaṁ dive-dive | goṣā u aśvasā asi
Mandala 9 · Verse 21
sammiślo aruṣo bhava sūpasthābhir na dhenubhiḥ | sīdañ chyeno na yonim ā
Mandala 9 · Verse 22
sa pavasva ya āvithendraṁ vṛtrāya hantave | vavrivāṁsam mahīr apaḥ
Mandala 9 · Verse 23
suvīrāso vayaṁ dhanā jayema soma mīḍhvaḥ | punāno vardha no giraḥ
Mandala 9 · Verse 24
tvotāsas tavāvasā syāma vanvanta āmuraḥ | soma vrateṣu jāgṛhi
Mandala 9 · Verse 25
apaghnan pavate mṛdho 'pa somo arāvṇaḥ | gacchann indrasya niṣkṛtam
Mandala 9 · Verse 26
maho no rāya ā bhara pavamāna jahī mṛdhaḥ | rāsvendo vīravad yaśaḥ
Mandala 9 · Verse 27
na tvā śataṁ cana hruto rādho ditsantam ā minan | yat punāno makhasyase
Mandala 9 · Verse 28
pavasvendo vṛṣā sutaḥ kṛdhī no yaśaso jane | viśvā apa dviṣo jahi
Mandala 9 · Verse 29
asya te sakhye vayaṁ tavendo dyumna uttame | sāsahyāma pṛtanyataḥ
Mandala 9 · Verse 30
yā te bhīmāny āyudhā tigmāni santi dhūrvaṇe | rakṣā samasya no nidaḥ
Mandala 9 · Verse 1
ete asṛgram indavas tiraḥ pavitram āśavaḥ | viśvāny abhi saubhagā
Mandala 9 · Verse 2
vighnanto duritā puru sugā tokāya vājinaḥ | tanā kṛṇvanto arvate
Mandala 9 · Verse 3
kṛṇvanto varivo gave 'bhy arṣanti suṣṭutim | iḻām asmabhyaṁ saṁyatam
Mandala 9 · Verse 4
asāvy aṁśur madāyāpsu dakṣo giriṣṭhāḥ | śyeno na yonim āsadat
Mandala 9 · Verse 5
śubhram andho devavātam apsu dhūto nṛbhiḥ sutaḥ | svadanti gāvaḥ payobhiḥ
Mandala 9 · Verse 6
ād īm aśvaṁ na hetāro 'śūśubhann amṛtāya | madhvo rasaṁ sadhamāde
Mandala 9 · Verse 7
yās te dhārā madhuścuto 'sṛgram inda ūtaye | tābhiḥ pavitram āsadaḥ
Mandala 9 · Verse 8
so arṣendrāya pītaye tiro romāṇy avyayā | sīdan yonā vaneṣv ā
Mandala 9 · Verse 9
tvam indo pari srava svādiṣṭho aṅgirobhyaḥ | varivovid ghṛtam payaḥ
Mandala 9 · Verse 10
ayaṁ vicarṣaṇir hitaḥ pavamānaḥ sa cetati | hinvāna āpyam bṛhat
Mandala 9 · Verse 11
eṣa vṛṣā vṛṣavrataḥ pavamāno aśastihā | karad vasūni dāśuṣe
Mandala 9 · Verse 12
ā pavasva sahasriṇaṁ rayiṁ gomantam aśvinam | puruścandram puruspṛham
Mandala 9 · Verse 13
eṣa sya pari ṣicyate marmṛjyamāna āyubhiḥ | urugāyaḥ kavikratuḥ
Mandala 9 · Verse 14
sahasrotiḥ śatāmagho vimāno rajasaḥ kaviḥ | indrāya pavate madaḥ
Mandala 9 · Verse 15
girā jāta iha stuta indur indrāya dhīyate | vir yonā vasatāv iva
Mandala 9 · Verse 16
pavamānaḥ suto nṛbhiḥ somo vājam ivāsarat | camūṣu śakmanāsadam
Mandala 9 · Verse 17
taṁ tripṛṣṭhe trivandhure rathe yuñjanti yātave | ṛṣīṇāṁ sapta dhītibhiḥ
Mandala 9 · Verse 18
taṁ sotāro dhanaspṛtam āśuṁ vājāya yātave | hariṁ hinota vājinam
Mandala 9 · Verse 19
āviśan kalaśaṁ suto viśvā arṣann abhi śriyaḥ | śūro na goṣu tiṣṭhati
Mandala 9 · Verse 20
ā ta indo madāya kam payo duhanty āyavaḥ | devā devebhyo madhu
Mandala 9 · Verse 21
ā naḥ somam pavitra ā sṛjatā madhumattamam | devebhyo devaśruttamam
Mandala 9 · Verse 22
ete somā asṛkṣata gṛṇānāḥ śravase mahe | madintamasya dhārayā
Mandala 9 · Verse 23
abhi gavyāni vītaye nṛmṇā punāno arṣasi | sanadvājaḥ pari srava
Mandala 9 · Verse 24
uta no gomatīr iṣo viśvā arṣa pariṣṭubhaḥ | gṛṇāno jamadagninā
Mandala 9 · Verse 25
pavasva vāco agriyaḥ soma citrābhir ūtibhiḥ | abhi viśvāni kāvyā
Mandala 9 · Verse 26
tvaṁ samudriyā apo 'griyo vāca īrayan | pavasva viśvamejaya
Mandala 9 · Verse 27
tubhyemā bhuvanā kave mahimne soma tasthire | tubhyam arṣanti sindhavaḥ
Mandala 9 · Verse 28
pra te divo na vṛṣṭayo dhārā yanty asaścataḥ | abhi śukrām upastiram
Mandala 9 · Verse 29
indrāyendum punītanograṁ dakṣāya sādhanam | īśānaṁ vītirādhasam
Mandala 9 · Verse 30
pavamāna ṛtaḥ kaviḥ somaḥ pavitram āsadat | dadhat stotre suvīryam
Mandala 9 · Verse 1
ā pavasva sahasriṇaṁ rayiṁ soma suvīryam | asme śravāṁsi dhāraya
Mandala 9 · Verse 2
iṣam ūrjaṁ ca pinvasa indrāya matsarintamaḥ | camūṣv ā ni ṣīdasi
Mandala 9 · Verse 3
suta indrāya viṣṇave somaḥ kalaśe akṣarat | madhumām̐ astu vāyave
Mandala 9 · Verse 4
ete asṛgram āśavo 'ti hvarāṁsi babhravaḥ | somā ṛtasya dhārayā
Mandala 9 · Verse 5
indraṁ vardhanto apturaḥ kṛṇvanto viśvam āryam | apaghnanto arāvṇaḥ
Mandala 9 · Verse 6
sutā anu svam ā rajo 'bhy arṣanti babhravaḥ | indraṁ gacchanta indavaḥ
Mandala 9 · Verse 7
ayā pavasva dhārayā yayā sūryam arocayaḥ | hinvāno mānuṣīr apaḥ
Mandala 9 · Verse 8
ayukta sūra etaśam pavamāno manāv adhi | antarikṣeṇa yātave
Mandala 9 · Verse 9
uta tyā harito daśa sūro ayukta yātave | indur indra iti bruvan
Mandala 9 · Verse 10
parīto vāyave sutaṁ gira indrāya matsaram | avyo vāreṣu siñcata
Mandala 9 · Verse 11
pavamāna vidā rayim asmabhyaṁ soma duṣṭaram | yo dūṇāśo vanuṣyatā
Mandala 9 · Verse 12
abhy arṣa sahasriṇaṁ rayiṁ gomantam aśvinam | abhi vājam uta śravaḥ
Mandala 9 · Verse 13
somo devo na sūryo 'dribhiḥ pavate sutaḥ | dadhānaḥ kalaśe rasam
Mandala 9 · Verse 14
ete dhāmāny āryā śukrā ṛtasya dhārayā | vājaṁ gomantam akṣaran
Mandala 9 · Verse 15
sutā indrāya vajriṇe somāso dadhyāśiraḥ | pavitram aty akṣaran
Mandala 9 · Verse 16
pra soma madhumattamo rāye arṣa pavitra ā | mado yo devavītamaḥ
Mandala 9 · Verse 17
tam ī mṛjanty āyavo hariṁ nadīṣu vājinam | indum indrāya matsaram
Mandala 9 · Verse 18
ā pavasva hiraṇyavad aśvāvat soma vīravat | vājaṁ gomantam ā bhara
Mandala 9 · Verse 19
pari vāje na vājayum avyo vāreṣu siñcata | indrāya madhumattamam
Mandala 9 · Verse 20
kavim mṛjanti marjyaṁ dhībhir viprā avasyavaḥ | vṛṣā kanikrad arṣati
Mandala 9 · Verse 21
vṛṣaṇaṁ dhībhir apturaṁ somam ṛtasya dhārayā | matī viprāḥ sam asvaran
Mandala 9 · Verse 22
pavasva devāyuṣag indraṁ gacchatu te madaḥ | vāyum ā roha dharmaṇā
Mandala 9 · Verse 23
pavamāna ni tośase rayiṁ soma śravāyyam | priyaḥ samudram ā viśa
Mandala 9 · Verse 24
apaghnan pavase mṛdhaḥ kratuvit soma matsaraḥ | nudasvādevayuṁ janam
Mandala 9 · Verse 25
pavamānā asṛkṣata somāḥ śukrāsa indavaḥ | abhi viśvāni kāvyā
Mandala 9 · Verse 26
pavamānāsa āśavaḥ śubhrā asṛgram indavaḥ | ghnanto viśvā apa dviṣaḥ
Mandala 9 · Verse 27
pavamānā divas pary antarikṣād asṛkṣata | pṛthivyā adhi sānavi
Mandala 9 · Verse 28
punānaḥ soma dhārayendo viśvā apa sridhaḥ | jahi rakṣāṁsi sukrato
Mandala 9 · Verse 29
apaghnan soma rakṣaso 'bhy arṣa kanikradat | dyumantaṁ śuṣmam uttamam
Mandala 9 · Verse 30
asme vasūni dhāraya soma divyāni pārthivā | indo viśvāni vāryā
Mandala 9 · Verse 1
vṛṣā soma dyumām̐ asi vṛṣā deva vṛṣavrataḥ | vṛṣā dharmāṇi dadhiṣe
Mandala 9 · Verse 2
vṛṣṇas te vṛṣṇyaṁ śavo vṛṣā vanaṁ vṛṣā madaḥ | satyaṁ vṛṣan vṛṣed asi
Mandala 9 · Verse 3
aśvo na cakrado vṛṣā saṁ gā indo sam arvataḥ | vi no rāye duro vṛdhi
Mandala 9 · Verse 4
asṛkṣata pra vājino gavyā somāso aśvayā | śukrāso vīrayāśavaḥ
Mandala 9 · Verse 5
śumbhamānā ṛtāyubhir mṛjyamānā gabhastyoḥ | pavante vāre avyaye
Mandala 9 · Verse 6
te viśvā dāśuṣe vasu somā divyāni pārthivā | pavantām āntarikṣyā
Mandala 9 · Verse 7
pavamānasya viśvavit pra te sargā asṛkṣata | sūryasyeva na raśmayaḥ
Mandala 9 · Verse 8
ketuṁ kṛṇvan divas pari viśvā rūpābhy arṣasi | samudraḥ soma pinvase
Mandala 9 · Verse 9
hinvāno vācam iṣyasi pavamāna vidharmaṇi | akrān devo na sūryaḥ
Mandala 9 · Verse 10
induḥ paviṣṭa cetanaḥ priyaḥ kavīnām matī | sṛjad aśvaṁ rathīr iva
Mandala 9 · Verse 11
ūrmir yas te pavitra ā devāvīḥ paryakṣarat | sīdann ṛtasya yonim ā
Mandala 9 · Verse 12
sa no arṣa pavitra ā mado yo devavītamaḥ | indav indrāya pītaye
Mandala 9 · Verse 13
iṣe pavasva dhārayā mṛjyamāno manīṣibhiḥ | indo rucābhi gā ihi
Mandala 9 · Verse 14
punāno varivas kṛdhy ūrjaṁ janāya girvaṇaḥ | hare sṛjāna āśiram
Mandala 9 · Verse 15
punāno devavītaya indrasya yāhi niṣkṛtam | dyutāno vājibhir yataḥ
Mandala 9 · Verse 16
pra hinvānāsa indavo 'cchā samudram āśavaḥ | dhiyā jūtā asṛkṣata
Mandala 9 · Verse 17
marmṛjānāsa āyavo vṛthā samudram indavaḥ | agmann ṛtasya yonim ā
Mandala 9 · Verse 18
pari ṇo yāhy asmayur viśvā vasūny ojasā | pāhi naḥ śarma vīravat
Mandala 9 · Verse 19
mimāti vahnir etaśaḥ padaṁ yujāna ṛkvabhiḥ | pra yat samudra āhitaḥ
Mandala 9 · Verse 20
ā yad yoniṁ hiraṇyayam āśur ṛtasya sīdati | jahāty apracetasaḥ
Mandala 9 · Verse 21
abhi venā anūṣateyakṣanti pracetasaḥ | majjanty avicetasaḥ
Mandala 9 · Verse 22
indrāyendo marutvate pavasva madhumattamaḥ | ṛtasya yonim āsadam
Mandala 9 · Verse 23
taṁ tvā viprā vacovidaḥ pari ṣkṛṇvanti vedhasaḥ | saṁ tvā mṛjanty āyavaḥ
Mandala 9 · Verse 24
rasaṁ te mitro aryamā pibanti varuṇaḥ kave | pavamānasya marutaḥ
Mandala 9 · Verse 25
tvaṁ soma vipaścitam punāno vācam iṣyasi | indo sahasrabharṇasam
Mandala 9 · Verse 26
uto sahasrabharṇasaṁ vācaṁ soma makhasyuvam | punāna indav ā bhara
Mandala 9 · Verse 27
punāna indav eṣām puruhūta janānām | priyaḥ samudram ā viśa
Mandala 9 · Verse 28
davidyutatyā rucā pariṣṭobhantyā kṛpā | somāḥ śukrā gavāśiraḥ
Mandala 9 · Verse 29
hinvāno hetṛbhir yata ā vājaṁ vājy akramīt | sīdanto vanuṣo yathā
Mandala 9 · Verse 30
ṛdhak soma svastaye saṁjagmāno divaḥ kaviḥ | pavasva sūryo dṛśe
Mandala 9 · Verse 1
hinvanti sūram usrayaḥ svasāro jāmayas patim | mahām indum mahīyuvaḥ
Mandala 9 · Verse 2
pavamāna rucā-rucā devo devebhyas pari | viśvā vasūny ā viśa
Mandala 9 · Verse 3
ā pavamāna suṣṭutiṁ vṛṣṭiṁ devebhyo duvaḥ | iṣe pavasva saṁyatam
Mandala 9 · Verse 4
vṛṣā hy asi bhānunā dyumantaṁ tvā havāmahe | pavamāna svādhyaḥ
Mandala 9 · Verse 5
ā pavasva suvīryam mandamānaḥ svāyudha | iho ṣv indav ā gahi
Mandala 9 · Verse 6
yad adbhiḥ pariṣicyase mṛjyamāno gabhastyoḥ | druṇā sadhastham aśnuṣe
Mandala 9 · Verse 7
pra somāya vyaśvavat pavamānāya gāyata | mahe sahasracakṣase
Mandala 9 · Verse 8
yasya varṇam madhuścutaṁ hariṁ hinvanty adribhiḥ | indum indrāya pītaye
Mandala 9 · Verse 9
tasya te vājino vayaṁ viśvā dhanāni jigyuṣaḥ | sakhitvam ā vṛṇīmahe
Mandala 9 · Verse 10
vṛṣā pavasva dhārayā marutvate ca matsaraḥ | viśvā dadhāna ojasā
Mandala 9 · Verse 11
taṁ tvā dhartāram oṇyo3ḥ pavamāna svardṛśam | hinve vājeṣu vājinam
Mandala 9 · Verse 12
ayā citto vipānayā hariḥ pavasva dhārayā | yujaṁ vājeṣu codaya
Mandala 9 · Verse 13
ā na indo mahīm iṣam pavasva viśvadarśataḥ | asmabhyaṁ soma gātuvit
Mandala 9 · Verse 14
ā kalaśā anūṣatendo dhārābhir ojasā | endrasya pītaye viśa
Mandala 9 · Verse 15
yasya te madyaṁ rasaṁ tīvraṁ duhanty adribhiḥ | sa pavasvābhimātihā
Mandala 9 · Verse 16
rājā medhābhir īyate pavamāno manāv adhi | antarikṣeṇa yātave
Mandala 9 · Verse 17
ā na indo śatagvinaṁ gavām poṣaṁ svaśvyam | vahā bhagattim ūtaye
Mandala 9 · Verse 18
ā naḥ soma saho juvo rūpaṁ na varcase bhara | suṣvāṇo devavītaye
Mandala 9 · Verse 19
arṣā soma dyumattamo 'bhi droṇāni roruvat | sīdañ chyeno na yonim ā
Mandala 9 · Verse 20
apsā indrāya vāyave varuṇāya marudbhyaḥ | somo arṣati viṣṇave
Mandala 9 · Verse 21
iṣaṁ tokāya no dadhad asmabhyaṁ soma viśvataḥ | ā pavasva sahasriṇam
Mandala 9 · Verse 22
ye somāsaḥ parāvati ye arvāvati sunvire | ye vādaḥ śaryaṇāvati
Mandala 9 · Verse 23
ya ārjīkeṣu kṛtvasu ye madhye pastyānām | ye vā janeṣu pañcasu
Mandala 9 · Verse 24
te no vṛṣṭiṁ divas pari pavantām ā suvīryam | suvānā devāsa indavaḥ
Mandala 9 · Verse 25
pavate haryato harir gṛṇāno jamadagninā | hinvāno gor adhi tvaci
Mandala 9 · Verse 26
pra śukrāso vayojuvo hinvānāso na saptayaḥ | śrīṇānā apsu mṛñjata
Mandala 9 · Verse 27
taṁ tvā suteṣv ābhuvo hinvire devatātaye | sa pavasvānayā rucā
Mandala 9 · Verse 28
ā te dakṣam mayobhuvaṁ vahnim adyā vṛṇīmahe | pāntam ā puruspṛham
Mandala 9 · Verse 29
ā mandram ā vareṇyam ā vipram ā manīṣiṇam | pāntam ā puruspṛham
Mandala 9 · Verse 30
ā rayim ā sucetunam ā sukrato tanūṣv ā | pāntam ā puruspṛham
Mandala 9 · Verse 1
pavasva viśvacarṣaṇe 'bhi viśvāni kāvyā | sakhā sakhibhya īḍyaḥ
Mandala 9 · Verse 2
tābhyāṁ viśvasya rājasi ye pavamāna dhāmanī | pratīcī soma tasthatuḥ
Mandala 9 · Verse 3
pari dhāmāni yāni te tvaṁ somāsi viśvataḥ | pavamāna ṛtubhiḥ kave
Mandala 9 · Verse 4
pavasva janayann iṣo 'bhi viśvāni vāryā | sakhā sakhibhya ūtaye
Mandala 9 · Verse 5
tava śukrāso arcayo divas pṛṣṭhe vi tanvate | pavitraṁ soma dhāmabhiḥ
Mandala 9 · Verse 6
taveme sapta sindhavaḥ praśiṣaṁ soma sisrate | tubhyaṁ dhāvanti dhenavaḥ
Mandala 9 · Verse 7
pra soma yāhi dhārayā suta indrāya matsaraḥ | dadhāno akṣiti śravaḥ
Mandala 9 · Verse 8
sam u tvā dhībhir asvaran hinvatīḥ sapta jāmayaḥ | vipram ājā vivasvataḥ
Mandala 9 · Verse 9
mṛjanti tvā sam agruvo 'vye jīrāv adhi ṣvaṇi | rebho yad ajyase vane
Mandala 9 · Verse 10
pavamānasya te kave vājin sargā asṛkṣata | arvanto na śravasyavaḥ
Mandala 9 · Verse 11
acchā kośam madhuścutam asṛgraṁ vāre avyaye | avāvaśanta dhītayaḥ
Mandala 9 · Verse 12
acchā samudram indavo 'staṁ gāvo na dhenavaḥ | agmann ṛtasya yonim ā
Mandala 9 · Verse 13
pra ṇa indo mahe raṇa āpo arṣanti sindhavaḥ | yad gobhir vāsayiṣyase
Mandala 9 · Verse 14
asya te sakhye vayam iyakṣantas tvotayaḥ | indo sakhitvam uśmasi
Mandala 9 · Verse 15
ā pavasva gaviṣṭaye mahe soma nṛcakṣase | endrasya jaṭhare viśa
Mandala 9 · Verse 16
mahām̐ asi soma jyeṣṭha ugrāṇām inda ojiṣṭhaḥ | yudhvā sañ chaśvaj jigetha
Mandala 9 · Verse 17
ya ugrebhyaś cid ojīyāñ chūrebhyaś cic chūrataraḥ | bhūridābhyaś cin maṁhīyān
Mandala 9 · Verse 18
tvaṁ soma sūra eṣas tokasya sātā tanūnām | vṛṇīmahe sakhyāya vṛṇīmahe yujyāya
Mandala 9 · Verse 19
agna āyūṁṣi pavasa ā suvorjam iṣaṁ ca naḥ | āre bādhasva ducchunām
Mandala 9 · Verse 20
agnir ṛṣiḥ pavamānaḥ pāñcajanyaḥ purohitaḥ | tam īmahe mahāgayam
Mandala 9 · Verse 21
agne pavasva svapā asme varcaḥ suvīryam | dadhad rayim mayi poṣam
Mandala 9 · Verse 22
pavamāno ati sridho 'bhy arṣati suṣṭutim | sūro na viśvadarśataḥ
Mandala 9 · Verse 23
sa marmṛjāna āyubhiḥ prayasvān prayase hitaḥ | indur atyo vicakṣaṇaḥ
Mandala 9 · Verse 24
pavamāna ṛtam bṛhac chukraṁ jyotir ajījanat | kṛṣṇā tamāṁsi jaṅghanat
Mandala 9 · Verse 25
pavamānasya jaṅghnato hareś candrā asṛkṣata | jīrā ajiraśociṣaḥ
Mandala 9 · Verse 26
pavamāno rathītamaḥ śubhrebhiḥ śubhraśastamaḥ | hariścandro marudgaṇaḥ
Mandala 9 · Verse 27
pavamāno vy aśnavad raśmibhir vājasātamaḥ | dadhat stotre suvīryam
Mandala 9 · Verse 28
pra suvāna indur akṣāḥ pavitram aty avyayam | punāna indur indram ā
Mandala 9 · Verse 29
eṣa somo adhi tvaci gavāṁ krīḻaty adribhiḥ | indram madāya johuvat
Mandala 9 · Verse 30
yasya te dyumnavat payaḥ pavamānābhṛtaṁ divaḥ | tena no mṛḻa jīvase
Previous Pages --------- Next Page
